Важöн нин окота гижны Кöрткерöс районын олысь аслам бур ёрт йылысь. Вöралö да чери кыйö. Позьö шуны, аслыс кынöмпöт перйö вадорын да пармаын. Но газетын сы йылысь гижöд, дерт, некор ог йöзöд. Медым мортсö оз мыждыны.

Веськыда кö, сiйö — талунъя аслыспöлöс «зверобой», кодi истöгтöг биасьö зэра лунö, пармаын сюмöдысь ас киöн вöчöм туисын, ковмас кö вермас пуны сёян, весиг 30 градус кöдзыд дырйи войсö коллялö коз улын, тöлын и гожöмын кыйö чери, прöмышляйтö пöтка-зверöс сэнi, кöнi, кыдз шуласны, гöн ни кок туй абу…

Нималана натуралист Бернгард Гржимек да вöр-васö мукöд туялысь эськö ёна и завидьтiсны сылöн тöдöмлун-сямлы. Од пöтка-зверлöн öбича йылысь сiйö эз кутшöмкö журнал-небöгысь да öтуввезйысь лыддьы. Кыйсян сямас сiйö велöдлöмаöсь на пöльыс да батьыс, сэсся тшöтш и вадорыс да яг-раскыс уна воöн вочасöн восьтöмаöсь ассьыныс гусяторъяссö.