gilgameš ana šâšumma izakkara ana ūta-napištim rūqi

anaṭṭalakkumma ūta-napišti
minâtuka ul šanâ kī yâtimma atta
u atta ul šanâta kī yâtimma atta

gummurka libbī ana epēš tuqunti
[x]x ahī nadât elu ṣērika
[att]a kī kī tazzizma ina puhur ilī balāṭa teš'u

ūta-napištim ana šâšumma izakkara ana gilgameš

lupteka gilgameš amāt niṣirti
u pirišti ša ilī kâša luqbika

šurippak ālu ša tīdûšu atta
ā[lu ša ina kišā]d puratti šaknu
[āl]u šū labirma ilū qerbuššu
[an]a šakān abūbi ubla libbašunu ilāni rabûti

[it]mama abūšunu anum
mālikšunu qurādu Enlil
[g]uzallâšunu ninurta
gugallâšunu ennugi

ninšiku ea ittišunu tamima
amāssunu ušannâ ana kikkišu

kikkiš kikkiš igār igār
kikkišu šimema igāru hissas
šuruppakû mār ubara-tutu
uqur bīta bini eleppa

muššir mešrê še'i napšāti
[m]akkūru zērma napišti bulliṭ
šūlima zēr napšāti kalāma ana libbi eleppi

eleppu ša tabannûši atta
lū mindudā minâtuša

http://www.soas.ac.uk